වතුනිවාස වල ඇතිවූ ගින්නෙන් අවතැන් වු පිරිස් හට ආරක්ෂිත ස්ථාන

බ්‍රවුන්ස්වික් වතු යායේ ක්වින්ස්ලන්ඩ් කොටසේ වතු නිවාස පේලියක (17) දින පස්වරුවේ හටගත් ගින්න විදුලි කාන්දුවිමකින් සිදු වි ඇති බවට ගින්න සම්බන්ධයෙන් පරික්ෂණ පවත්වන මස්කෙලිය පොලිසිය සැකකරයි. එම ගින්නෙන් වතු නිවාස පේලියේ තිබු නිවාස 20 ක් ගිනිගෙන විනාශ විය.

පැතිර ගිය ගින්න මස්කෙලිය පොලිසියේ නිලධාරින්, නුවරඑලිය මහ නගර සභාවේ ගිනි නිවිමේ භට පිරිස්, යුධ හමුදා භට පිරිස් සහ වතු කම්කරුවන් එක් ව පැය දෙකකට ආසන්න කාලයක් දැඩි පරිශ්‍රමයක් දරා පාලනය කිරිමට සමත්විය. එක් නිවසකින් හටගත් ගින්න සෙසු නිවාස වලට සිඝ්‍රයෙන් පැතිර ගොස් ඇති බවට සැක කරයි.

ගින්නෙන් වතු කම්කරුවන්ට අයත් පෞද්ගලික බඩු බාහිරාදිය විශාල වශයෙන් විනාශයට පත් වි තිබුණි. ගින්නෙන් කිසිවෙකුට අනතුරක් සිදු වි නොමැත.

ගින්නෙන් අවතැන් වු නිවාස 20 පදිංචි සමාජිකයන් 78 දෙනෙකු එම වතු යායේ දමිල මහා විද්‍යාලයේ තාවකාලිකව නතර කර ඇති අතර වතු පාලන අධිකාරිය , ආපදා කලමණාකරණ ඒකකය සහ මස්කෙලිය ප්‍රාදේශිය සභාව ඔහුන්ට පිසු ආහාර සහ යටිතල පහසුකම් ලබා දිමට කටයුතු කර ඇත.

Related posts

Leave a Comment