ඉදිරි සති දෙක මෙරටට ඉතාමත් අවදානම් – වෛද්‍ය නවීන් ද සොයිසා

පවතින කොවිඩ් තත්ත්වය අනුව ඉදිරි සති දෙක මෙරටට ඉතාමත් අවදානම් සහ තීරණාත්මක බව රජයේ වෛද නිලධාරීන්ගේ සංගමය පවසයි.
 
 වෙසක් සතිය අවසන් වන තුරුම සංචරණ සීමා ඉතා තදින් ක‍්‍රියාත්මක කළ යුතු බවත් සෞඛ්‍ය නීතීන්ට අනුගතව එය පවත්වාගෙන යෑමට අපොහොසත් වන්නේ නම් රෝගීන්ගේ සංඛ්‍යාව මෙන්ම සිදුවිය හැකි මරණ සංඛ්‍යාවද අසාමාන්‍ය ලෙස ඉහළ යා හැකි බවත් එම සංගමයේ සහකාර ලේකම් වෛද්‍ය නවීන් ද සොයිසා මහතා පවසයි.
 
 පසුගිය මාස දාහතරක තුළ මෙරටින් කොවිඞ් ආසාදිතයින් ලක්‍ෂයක් පමණ වාර්තා වුවත් පසුගිය මාස දෙකහමාරක කාල සීමාවේදී රෝගීන් හතළිස් දහස ඉක්මවා වාර්තා වීම මෙම රෝගයේ ප‍්‍රබලතාව අනුව මෙරට සෞඛ්‍ය අංශයට දැරිය හැකි ධාරිතාව ඉක්මවා යෑමක් බවත් හෙතෙම සඳහන් කළේය.
 
 කොරෝනා රෝග ව්‍යාප්තිය සමග පළමු මාස 13-14 අතර කාල සීමාවේදී මරණ 500 ක් පමණ වාර්තා වුවත් ඉකුත් මාස දෙකක කාල සීමාවේදී එම මරණ සංඛ්‍යාවම වාර්තාවීම කොවිඩ් රෝග තත්ත්වයේ ප‍්‍රබලත්වය පෙන්නුම් කරන්නක් බවද වෛද්‍ය නවීන් ද සොයිසා මහතා සඳහන් කළේය.

Related posts

Leave a Comment